منحة الجامعة الالمانية بالقاهرة

عارفين الجامعة الألمانية بالقاهرة؟
اللي اسمها GUC ومصاريفها بتتراوح من 44 إلي 64 ألف جندي مجهول في الترم! 🤔
امبارح الجامعة أعلنت ع الموقع بتاعها عن نوع غريب من المنح الطلابية أنا شخصيا أول مرّة أسمع عنه، لا وطلع بيبقي كل سنة كمان!
--
المنحة مُقدمة للي خلصوا ثانوي السنة دي (2017) ومرتبين من الـ 10 الأوائل سواء علي الجمهورية أو علي محافظاتهم.  🤓🎎
--
* المنحة بتغطي إيه؟
- كل مصاريفك الدراسية علي مدار سنين الدراسة (اللي هم 4 أو 5 سنين) 🤑
- سكنك وأكلك وشربك (لو انت من خارج القاهرة)
- مواصلاتك (لو انت من خارج القاهرة)
- مصاريف اختبار القبول (هقولك هو ايه تحت)
- احتمال يدولك لاب توب
--
* مين يقدّم ع المنحة دي؟
- المواطن المصري (سمعونا زغروطة يا جدعااان بقي لينا قيمة اهو)
- تكون من الأوائل علي محافظتك.
- تعدّي اختبار القبول. (هقولك عليه تحت)
- لو هتقدم علي كلية من كليات (الفنون أو العلوم التطبيقية أو الهندسة المعمارية) فلازم تعدي اختبار الكفائة. (عارف لما حد يقولك انت عيل كفائة -غالبا من سواقين التكاتك- هو ده الامتحان) 😂
--
* نقدم ازاي؟
- تملي الأبلكيشن الأونلاين من هنا 👈 https://goo.gl/wemhLz
- تروح تعمل اختبار القبول (هقولك عليه تحت)
- شوية الأوراق دول: 📘
_ بيان درجات (مستخرج رسمي) بيطلع من المدرسة غالبا.
_ أصل شهادة الميلاد.
_ خطاب رسمي من الدرسة بتاعتك ويتختم من المنطقة التعليمية اللي انت تابع عليها مُتضمن حاجتين 1- إن مدرستك مدرسة حكومية مش خاصة أو لغات. 2- إن إنت من الـ 10 الأوائل علي محافظتك.
_ 6 صور مقاس الباسبور (هتروح لبتاع التصوير وهو هيعمله)
_ نموذج 6 جند للأولاد.
_ هتكتب Personal statement بتشرح فيه خصائص المحافظة بتاعتك (بتتميّز بإيه، ناقصها ايه .. وهكذا) وكمان انت ناوي تعمل ايه تجاه مشاكلها دي.
_ أخيرا، لازم يكون معاك وليّ الأمر وانت بتقدم الورق ده علشان يمضي ع الورق المتعلق بالمنحة.
--
ملحوظات:
- آخر ميعاد للتقديم يوم 30-7 يعني بعد خمشتاشر يوم.
- في حاجه اسمها GPA اللي هو معدلك التراكمي نهاية كل سنة، لازم يكون أعلي من 3 علشان المنحة تفضل مستمرة.
- لما هتضغط ع اللينك بتاع التقديم اللي فوق هيفتحلك صفحة تختار منها GUC admission 2017/2018 apply online
- بتعمل أكونت عادي جدا وتمشي مع البلكيشن واحده واحده.
- اختبار القبول بيكون عبارةامتحان إنجلش (قواعد وقراءة واستماع) وامتحان IQ لقياسة مدي ذكاء حضرتك. محتاج تتدرب عليهم مثلا جرب دول 👇
https://goo.gl/ymrkxU
https://goo.gl/u8oFsx
- بالنسبة لطلبة الثانوية الأزهرية، هما مش مذكورين فأنا بعت إيميل ومستني الرد والله المستعان!
- متنساش تشترك في AYB 👊👊
- كل الحاجات دي طبعا بجانب مزايا تانيه منها طبعا إنها طريق سهل لألمانيا وجامعه ليها اسمها ومحدش هيوقفك في كمين حقيقي 😎
- آخر ميعاد للتقديم 30-7
--
الأسئلة أو المشاكل اللي ممكن تقابلك وانت بتقدم وركز اوي:
1- الـ E-mail اللي هو البريد الإلكتروني وملوش علاقة بالفيس بوك (هو وسيلة علشان أعمل أكونت ع الفيس ووسيلة بردو علشان أعمل أكونت علي موقع الجامعة أو أي موقع) وده اللي بتابع من عليه اي حاجه متعلقة بالأبلكيشن.
2- أعمل إيميل ازاي؟  👈 https://goo.gl/pnoUgR
ومحدش يعمل ميدو الروش ولا عصفور الجنة والكلام ده.
3- ايه هو الـ Personal Statement ده؟
ده حلجه زي مقال كده، بتكتبه ع الـ Word ، غالبا بيكون له عدد كلمات محدد، بس هنا مفيش فعيش حياتك. ركز فيه علي مشكلة معينى انت شايفها في مجتمعك وازاي هتقدر تحلها سواء وانت في الجامعة أو بعد ما تتخرج.
مش محتاج أقولك إنه بالإنجلش، ومفيش مانع تخلي حد يراجعهولك بعد ما تخلص.
4- هيقبلوا كام واحد في المنحة دي؟
54 طالب/طالبة
5- أنا متخرج السنة اللي فاتت وكنت مرتب ع المحافظة ينفع أقدم السنة دي؟
لا
6- درسة في مدارس خاصة؟
لازم ثانوية عامة بتاعة الحكومة.
7- إيه الكليات اليي أقدر أقدم عليها؟
وانت بتملي الأبلكيشن هيديلك قايمة بكل الكليات المتاحة.
8- أنا طالب أزهري؟
موّت نفسك
9- ينفع أقدم بعد الـ Deadline؟
لا أعتقد هذا. =D

--

احنا عندنا 27 محافظة، مؤهل يقدم 10 من كل محافظة، يعني 270 طالب من حقهم يقدموا ع المنحة دي. حاولوا تنقلوا الكلام ده علي أوسع نطاق وخلوهم يتعلموا حاجه تنفعهم. copy- past - cut - share - print أي حاجه المهم الكلام ده يوصلهم.

المصدر: https://goo.gl/UT3M8v